kaaitjie botter

By ons Kaapse depot werk daar 'n forklift drywer. Ek is mal oor hom want hy het houding genoeg vir 'n staatshoof en 'n bek om daarmee saam te gaan. Werklik 'n rare awis. Die ding met hom is dat hy baie brood eet. So as jy te laat in die kombuis kom het hy al die brood sowel as smeergoed opgevreet. Nou moenie dink smeergoed in 'n depot is fancy nie - jy moet kies tussen konfyt, marmite, sandwich spread en kaaitjie botter. Ek wil absoluut niks sê oor sandwich spread nie, dit is te traumaties.

As skoolkind van beide voltyds werkende ouers het my arme ma maar min energie oorgehad om broodjies te maak en was dit maar polonie, marnite en kaas of kaaitjie botter en stroop. Die kinders deesdae het sulke gesonde polities korrekte kosblikke vol heilsame, mooi kossies, neute en vrugte. Ons dae was 'n warm halwe brood gevul met slaptjips en sous of te wel 'n katkop net die ding om jou besige liggaam te onderhou.

Maar laat ek nou terugkom op my storie. So kom ek eendag te laat in die kombuis na die forklift bestuurder en vind net twee korsies en 'n kwart bottel kaaitjie botter. Ek besluit toe maar dat ek nou vir die eerste keer sedert skool dit weer gaan probeer. Ek rooster die korsies, smeer lekker botter op en gee toe 'n dik laag kaaitjie botter. Ek maak toe vir my 'n lekker koppie koffie met vars gemaalde bone om daarmee saam te drink. Nou kou jy laat dit so styf in jou mond sit en spoel die besigheid af met die koffie. Sjoe, is dit nie wonderlik nie!

Wys jou maar net hoe die eenvoudige dinge in die lewe die beste bly.

vodka

Nee, nie noodwendig om te drink nie. Ek is besig om drie pasta sous resepte te test drive. Die eerste hiervan is pasta met vodka  en italiaanse wors sous. Ek het dit gisteraand gemaak en ons het ons behoorlik oorvreet. Wat jy benodig vir 4 mense is:

500g tagliatelli
lekker treksel olyf olie
italiaanse wors, dis hulle weergawe van boerewors met meer varkbasis, jy haal die vleis uit die derm uit. Jy kry dit net by deli's. Jy kan ook gerookde spek of varkworsies gebruik
een halwe ui, fyngesny
sout
grypie rooi peper vlokkies
fyn knoffel, so 2 huisies
1 blik Italiaanse tamaties
3 eetlepels vodka
dubbel room, so 100 - 150 ml
handvol fyngesnyde vars basil en italiaanse pietersielie, los so paar blaarjies basis om aan die einde bo op te sit vir die mooigeit
handvol vars gerasperde Parmigiano-Reggiano

Nou bring jy bietjie olyfolie in jou pan op spoed. Gooi die binnegoed van die worsies in die pan en laat dit lekker braai, voeg nou jou uie, sout en rooi peper vlokkies by en nadat dit blink begin raak jou knoffel en tamaties. Sodra dit dikkerig begin word voeg 3 eetlepels vodka by en reduseer die sous bietjie. Roer die room in en gee kans om vir so 2 minute stadig te prut. Roer jou fyn kruie by en verwyder van hitte.

Nou die pasta. Ek gebruik hiervoor goeie kwaliteit gedroogde tagliatelli. Dit neem 5 minute om te kook. As jou skip ingekom het, gebruik vars gemaakde pasta en dit neem 2 minute. Of as jy nie klein kinders het nie, en nog oor jou lewe beskik - maak jou pasta! Nou roer jy die sous goed deur die gedreineerde pasta maar moenie dit stukkend maak nie.

Skep op en garneer met kaas en basil blaartjies. Skink die Chenin Blanc. Steek op die kers en vertel jou vrou hoe mooi sy vir jou is en hoe jammer jy is dat jy nie meer tyd maak om met haar te connect nie!