Ek weet nie wat met my aangaan nie maar ek wil die laaste tyd net stampkoring eet. Ek sit agter my lessenaar by die werk. Ek het 'n bordjie met vars tamaties en gisteraand se koue stampkoring wat ek opgedoen het met 'n dash olyfolie, mayonnaise, vars tiemie, feta kaas, sout en swart peper. Dis wonderlik EN cheap! Dis vir my so eienaardig dat 'n mens ou, eenvoudige kosse vergeet en dis nie 'n vergeet gebore uit afgryse nie! Stampkoring, pearled wheat of pearled barley kos minder as R10 per pakkie en kan heerlik in plaas van rys en selfs pasta geregte gebruik word. Jy spoel dit eers lekker skoon. Maak die pot vol vars water. Jy benodig seker so 3 koppies vars water per koppie koring. Dan bring jy die lotjie tot kookpunt en laat dit dan prut vir so 20-30 minute. As die water begin verdwyn kan jy dit ook so bietjie droog stoom.
Ek het gisteraand 'n heerlike "butter chicken" gemaak wat baie lekker saam met die koring gaan. Dis nou so helwarm hier by ons dat mens nie krag het vir enige iets wat moeite verg nie. Ek grawe toe so halfhartig in die koskas en kom af op 'n amper vergete pakkie Ina Paarman butterchicken cook-in sousie. Hoenderposies, uie, knoffel en 'n gryp gemmer word dadelik in die pot gebraai. Sny 'n handvol elk van die volgende - wortels, patats en baby marrows (ek het nie 'n clue wat dit in Afrikaans is nie). Sampioene sal ook werk. As jy dalk 'n blikkie borlotti of butterbeans het - gooi dit ook in maar raak net eers van die water ontslae! Iemand vertel my die ander dag hoe sy sommer so blik en water en alles ingooi! Nee man sies.
Die oomblik wat die porsies lekker goudbruin is, gooi jy die groente in en voeg tannie Ina se sousie mooi egalig bo-oor by. Sit die deksel op en laat stadig prut vir so 45 minute. Op daardie stadium is dit so warm in die kombuis dat ek dadelik deur die swembad spring en dit volg deur 'n gallon koue water te drink!
Die huis is nou half donker, die kinders slaap. As jy 'n koue witwyn het, gooi dit in twee glase. Skep die heerlike butterchicken mengsel oor die koring. Eet dat die sweet so loop maar dis tongklap lekker!
Nabetragting: oor die algemeen probeer ek kosmakery nastreef wat fees vier met dit wat basies, lekker, heilsaam en gesellig is. Daar is ook by my 'n soeke na outydse waardes en resepte wat iets meer wil sê van die kok en die eters. Soms, soos gisteraand, is dit egter nodig en selfs lekker om te kyk na wat jy het en dan interesante kortpaaie daarmee te volg. Ek sal meestal sê dat mens byvoorbeeld jou eie kerrie mengsel in die pan moet aanmaak. Maar al wil ek ook hoe graag, kan ek nie altyd uitkom by die klein spesery winkels soos Atlas Trading in die bo-Kaap of Spice Mecca in Durban se dorpskern nie. Dan moet 'n mens bietjie sif deur wat beskikbaar is en daarom voel ek dat Tannie Ina uitstekende, gesonde opsies verskaf om jou net twee keer te laat dink voordat jy Panarotti's bel!
