Hierdie resep is 'n variasie op 'n resep wat ek reeds gedeel het. Dis die "go-to" resep as jy met jou hande in jou hare sit, jou skoonma kom kuier of jy wil die meisie impress met jou vaardigheid in die kombuis.
Bestandele vir 4 mense:
1 pak penne pasta
1 koppie sagte roomkaas, jy kan dit effens opwarm sodat dit makliker smelt
1 fyngekap handvol dill
'n koppievol jong ertjies
4 groen uitjies, fyngesny
1 suurlemoen se sap sowel as die skil (zest)
1 eetlepel dijon mostert
'n lekker handvol capers
so 200 gram gerookde salm, in langwerpige strokies gesny
'n grypie of twee sout en swartpeper
so bakkie vars parmesan kaas as jy het
Kook jou penne pasta in lekker baie sout water. Nie te pap nie asseblief! Skep so paar lepels van die styselagtige pasta water uit en hou eenkant. Gooi sommer die ertjies by vir so 3 minute voor jy die pasta afhaal. Dryneer die pasta en gooi terug in die pot. Skep die pasta water wat jy eenkant gehou het (so 200ml) weer terug in die pot. Gooi al die bestandele by die pasta behalwe die salm. Roer versigtig deur todat die roomkaas 'n sous vorm. Op die laaste oomblik roer jy jou salm by, sprinkel sout en peper na smaak oor met 'n gooisel parmesan en 'n paar druppeltjies olyfolie. Skink bietjie wyn en smul. Eet redelik vinnig as jy kan want die ander mense gaan al die seconds opvreet!
No comments:
Post a Comment