geposjeerde eiers

Ek weet helfte van julle gaan dink wie se ma se geposjeerde...nee! Dit gaan hier oor iets so wonderlik en so dekadent dat jy nadat jy dit geproe het, heeltemal sal afsien van enige mediese advies teenoor eiers. Ek maak dit nog erger, ek hou van die eggs benedict waar jy die moeder van Franse souse, die Hollandaise sous, byvoeg. Dit bestaan uit BAIE botter. Belowe net jy sal dit ten minste een keer per maand vir jou hart se punt in die bed gee of nog beter vir jouself op 'n Sondag aand voor die MNet movie. Ek reken dat jy dit in enige verhouding kan gebruik om ongeveer 50% nader aan 'n gelukkige verhouding te wees.

Om eiers te posjeer in sjef skole is wild, en daar is meer as een aspirant sjef wat al sy tande op dit stukkend geval het. Die mense werk met water en asyn en die tegniek is min of meer ewe moeilik en het dieselfde kans op sukses om gestopte seekoei gaar te kry. Koop by 'n kombuiswinkel so yster pannetjie (foto):

Dit kos minder as R100. Myne staan in een van my panne op sulke voetjies en het 3 holtjies waarin ek net die eir breek. Dan voeg jy bietjie water in die pannetjie, sit die deksel op en laat so 4-5 minute stewig prut. Onthou om net onder in holtetjies bietjie olyfolie te smeer sodat die eiertjies mooi glad uitkom.

Ek vat gister se ciabatta, rooster dit lekker in die oond. Nou keer jy die eier daarop uit. Gooi lekker hollandaise sous bo-oor en as jy wil, bietjie vars kruie. Dis ook lekker om die eier op watercress neer te sit op die brood en dan die sous bo-oor. Dit laat jou darem voel asof jy iets effens gesond en vars eet. Kyk nou hoe almal hulle wonderlike eier oopsny en die sagte binnekant saam met die ryk sous opslurp. Ek is werklik jammer vir diegene wat nie eier eet nie. Ek sal nog die ander tipe eiers uit my lewe kan sny maar  nie vir poachy-poachy nie!

Hollandaise Sous

Jy benodig:
3 eiergele
1 eetlepel water
1 eetlepel vars lemoensap
1 koppie botter, gesmelt maar nie bruin nie
1 grypie rooi peper of paprika 
Sout en peper na smaak 

Klits die drie eiergele, water en suulemoensap todat dit effens dikker en valer word. Smelt die botter langsaan baie saggies, amper net af van smelt af.

Nou moet jy die wyn neersit en die kinders uit die kombuis jaag want die job kan jy nie doen met skreeuende gesiggies en geraas rondom jou nie. Giet die eiermengsel in ‘n klein souspannetjie oor laerige hitte en klits eweredig – jy wil nie roer eiers hê nie. Lig die pannetjie gedurig van die hitte af as dit wil begin klonte vorm. Jy sal sien dit raak amper skuimerig en dik. Haal dit af van die hitte af en begin die botter bietjie-bietjies byroer. Soos die botter begin emulsifiseer (sien ek ken ook fancy terme) kan jy groter hoeveelhede byroer todat alles opgeneem is in die sous.

Voeg nou die sout, peper en rooipeper by terwyl jy nog bly roer. Jy kan selfs nog ‘n bietjie suurlemoensap bysit maar doen dit druppel vir druppel tewyl jy bly roer. Siedaar, jou Hollandaise is gereed.

risotto alla vegan

Ek wonder partykeer hoekom ek myself aan hierdie uitdagings oorlewer? Maar hoe nou gemaak as jy dierbare vriende kry vir ete en hulle is amper vegans. Volgens Wikipedia is hulle sogenaamde "Lacto-vegetarians" of mense wat geen vleis of eiers eet nie maar wel sekere suiwel produkte. Maar my probleme stop nie hier nie, die vriende drink ook geen alkohol nie en ek is baie lief om te kook met wyn en ander vorms van booze! Natuurlik proe ek ook so van tyd tot tyd net om seker te maak dat die wyn goed genoeg is vir die kos!

Ek besluit om Risotto te maak. Die laaste ding wat el wil doen is om hulle af te skeep met iets soos gestoomde broccoli met 'n wortel as bykos! Risotto is comfort food en ek glo dat dit enige iemand vol en gemaklik kan laat afgly teen sy stoel. Die regte risotto is 'n rys, sogenaamde Arborio rys en daar is nie 'n eier naby nie. Wees net versigtig, mens kry ook 'n pasta rys wat soms as risotto bemark word. Ek gebruik wilde en bruin sampioene as my basis. Mens kan ook nie sommer enige kaas gebruik nie. Pecorino en ander kase het baiekeer 'n diere byproduk in wat 'n "rennet" genoem word, en dit help met die stollingsproses. Wat wel veilig is, is Gruyere kaas. Daar score ek want dit is 'n wonderlike kaas, ryk en romerig maar skerp genoeg om lewe te gee aan my risotto.

Nou moet ek die wynprobleem oorkom. Wanneer jy risotto maak moet jy wyn redelik vroeg in die proses byvoeg. Dit word heeltemal weggekook so mens sou seker kon redeneer dat daar geen alkohol oor is nie maar uit respek vir my vriende het dit nie reg gevoel nie. Wat gee wyn jou nou eintlik in kos? Smaak, ja sekerlik maar wat anders? Eintlik is dit maar net suurkwaliteite of accidity. Kosmaak is mos maar soos die lewe, jy probeer balans inbou. Die balans van verskillende smake gee 'n diepte. Partykeer maak mense kos met geen diepte nie omdat hulle net 'n halfliter room oorgooi en dan dink dit behoort lekker te wees. Interessante kos is kos wat bestaan uit 'n bousel van vae smake, soms skerper smake en bo alles verassende vars smake. Ek dwaal alweer maar ek kan nie help om kosmaak te bind aan die lewe nie.

Dis vraagstukke in my lewe, wat my partykeer wakker hou in die nag. Het my lewe genoeg genuanseerde plekkies waar ek verkillende aspekte van my persoonlikheid in balans kry en my plek in my gesin, my gemeenskap, my land en die universe met liefde vul? Ek weet nie, maar as ek staan voor die kospotte is dit dieselfde vraagstukke waaroor ek wonder. Moet ek die grypie chillie hier ingooi en hoeveel gaan dit brand? Maar as ek hom nou ingooi en genoeg tyd gee om agter in die koor te gaan staan word hy dalk die treksel room se beste vriend omdat romerigheid met 'n klein byt in agtergrond tog beter is as net plein boring romerig. So my raad: speel met kruie en speserye, speel met die verskillende balanse en moenie bang wees om te waag nie - ook in jou lewe!

Reg, ek is so afgedwaal dat ek nie weet waar ek was nie. Lang storie kort, vervang wyn met groente aftreksel en so treksel wit druiwe asyn of suurlemoensap. Volg dieselfde basies resep vir risotto wat ek al gedoen het. Al verskil is die groenteaftreksel, die asyn en aftrekselmengsel in plaas van die wyn en die gruyere kaas. Saam met die sampioene, gruyere, vars origanum en pietersielie en siedaar - die vegetarian express verlaat die stasie.